გადავწყვიტეთ საფუძვლიანად გავცნობოდით ქვევრის ღვინის წარმოების ტექნოლოგიას. ამ მიზნით ჩვენი თანაკლასელი გიორგი მესხიძე გაემგზავრა ლაგოდეხის რაიონის სოფელ შრომაში გაესაუბრა მეღვინე თამაზ გოთვაძეს, ჩაიწერა ინტვერვიუ, დაათვალიერა მისი მარანი და თბილისში დაბრუნებულმა გაგვიზიარა შთაბეჭდილებები.
Friday, May 28, 2021
Wednesday, May 26, 2021
ქართული სულის ზეიმი სოხუმის სახელმწიფო უნივერსიტეტში
სოხუმის სახელმწიფო უნივერსიტეტის ულამაზეს სააქტო დარბაზში ზეიმობდა ქართული სული, საღამოს ორგანიზატორი და მასპინძელი, ქალბატონი მარიკა ზედელაშვილი სიყვარულითა და სითბოთი ეგებებოდა სტუმრებს... ლექსს სიმღერა ცვლიდა, სიმღერას - მოგონება... სევდიანმა და უჩვეულოდ თბილმა საღამომ გაგვახსენა მერაბ კოსტავა და 18 წლის ბეგი მამალაძე... ნორჩი დეკლამატორები კითხულობდნენ ლექსებს, ჟღერდა უჩვეულოდ ლამაზი მელოდია... საღამოს მონაწილეებს ჩვენი მოსწავლეებიც შეუერთდნენ, ეკატერინე ნავოიანმა შეკრებილთ ბეგი მამალაძის შემოქმედებით აღძრული შთაბეჭდილებები გაუზიარა და წაიკითხა ჩანახატი ,,კიბე ცამდე," რატი მეტრეველმა ააჟღერა მელოდია, რომელიც კომპოზიტორმა გია ყანჩელმა შექმნა სპექტაკლისთვის ,,რიჩარდ მესამე"...
გაზაფხულის მშვიდი და თბილი საღამო კლასიკური მუსიკის ჰანგებმა დაგვიტკბო და გაგვილამაზა... დავემშვიდობეთ გულთბილ მასპინძელს, რომელმაც გვისახსოვრა მერაბ კოსტავას ლექსების კრებული და ბეგის ნახატი ,,დიდგორის ბრძოლა"... ფეხით დავადექით გზას, რომელიც მოგონებებსა და შთაბეჭდილების ტყვობაში მყოფთათვის სწრაფად გაილია, მოვდიოდით, ერთმანეთს ვუზიარებდით განცდებს და ვფიქრობდით ორი შემოქმედის - მერაბ კოსტავასა და ბეგი მამალაძის - ფიქრის საგანზე, შეჭირვებულ საქართველოზე და ვოცნებობდით საყვარელი მამულის გამთლიანებაზე...
Tuesday, May 25, 2021
შეხვედრა ნინო ზედელაშვილთან
25 მაისს ჩვენი საპროექტო ჯგუფის წევრები, ქართული კულტურით, საქართველოს ბუნების სილამაზით, პროზითა და პოეზიით დაინტერესებული ადამიანები Teams-ის საგანმანათლებლო სივრცეში შევიკრიბეთ და ამაოდმოუბარ ქალბატონებს ვუმასპინძლეთ... საღამო დავიწყეთ უჩვეულოდ ლამაზი გუდამაყრის ხეობის საცნობარო ფოტოკოლაჟით, რომელსაც ამშვენებდა დეკანოზ თავმაზ ჩოხელის სიმღერა და ამონარიდები გოდერძი ჩოხელის ლექსებიდან. გუდამაყარის ხეობაზე, მის ისტორიაზე, კულტურასა და ტრადიციებზე ვებინარი ჩაგვიტარა პოეტმა, პუბლიცისტმა, გოდერძი ჩოხელის ბიოგრაფმა, ქალბატონმა ნინო ზედელაშვილმა. ქალბატონმა ნინომ ბევრი რამ გვიამბო, უპასუხა ჩვენს კითხვებს, გაიხსენა ჩოხელის პროზა, პოეზია, დაწვრილებით განვიხილეთ და გავაანალიზეთ საოცარი ფილმი ,,სამოთხის გვრიტები," გავიგეთ, პატარა გოდერძის როგორ ,,დაუძახა კინომ", წლების შემდეგ როგორ ჩაირიცხა თეატრალური ინსტიტუტის სარეჟისორო ფაკულტეტზე და როგორ იქმნებოდა არაჩვეულებრივი ფილმები: ,,აღდგომა", ,,ლუკას სახარება", ,,ადამიანთა სევდა" ,,ადგილის დედა"...
ვებინარის მეორე ნაწილში ექვსი წლის წინ (2015 წლის 25 მაისს) მუხანათურად მოკლული ახალგაზრდა შემოქმედი ბეგი მამალაძე გავიხსენეთ, ვისაუბრეთ მის ნოველებზე, ლექსებზე, ნახატებზე, ჩვენმა სტუმრებმა, ბეგის დედამ, ქალბატონმა მარიკა ზედელაშვილმა და ახალგაზრდა კომპოზიტორმა თაკო კერესელიძემ ნიჭიერი და მრავალმხრივი შემოქმედის ხანმოკლე ცხოვრების საინტერესო და სევდიანი ისტორიები გაიხსენეს... საინტერესო საუბარი დიდხანს გაგრძელდა, ვსვამდით კითხვებს, რადგან გვინდოდა, მეტი გაგვეგო ჩვენს თანატოლ ბიჭზე, რომელიც თავის სიყვარულიან სამყაროში იწვევდა ყველას და გვაცნობდა საქართველოს, სადაც ,,შავლეგოს მღერიან", ვებინარის მონაწილეებმა ერთხმად დავგმეთ ძალადობა. საინტერესო და სევდიანი ,,ფიქრთ გასართველი" საღამო დავასრულეთ კომპოზიტორ ნანა ბალახაშვილის ,,სამყაროს ჰიმნით," ულამაზეს მელოდიას, იმედიანი ხვალინდელი დღის საწყისივით, თან სდევდა და თავისებურ ხიბლს სძენდა ჩვენი სასკოლო ცხოვრების ამსახველი ფოტოკოლაჟი.
მადლობა ვებინარის ყველა მონაწილეს, სტუმრებს, ორგანიზატორებს, #32 საჯარო სკოლის ხელმძღვანელობას, მასწავლებლებს, საპროექტო ჯგუფს ასეთი ლამაზი და შთამბეჭდავი შეხვედრის ორგანიზებისათვის.
- ელენე არსენაძე
Friday, May 21, 2021
კალიგრაფიის გაკვეთლი - ლელა გაფრინდაშვილი
უღრმესი მადლობა ქალბატონ ლელას საინტერესო გაკვეთილისთვის.
- ანანო მარგიშვილი
Thursday, May 20, 2021
შეხვედრა/ვებინარი ქართული ვიკიპედიის რედაქტორ, ისტორიკოს ჯაბა ლაბაძესთან
შეხვედრის თემა გახლდათ: ,,ვიკიპედია და კულტურული მემკვიდრეობა.“ მოსწავლეებმა გაიგეს, რომ მათი თანატოლები ვიკი-ჯგუფის წევრები არიან და ქმნიან ისტორიას, ამუშავებენ ინფორმაციას მატერიალური თუ არამატერიალური კულტურული ძეგლების შესახებ და განათავსებენ ვიკიპედიაში. დაიბადა სურვილი ამგვარი მუშაობის, რაზედაც ბატონი ჯაბასაგან მივიღეთ შემოთავაზება. იგი სკოლაში გვეწვევა და სამუშაო შეხვედრას გამართავს ბავშვებთან, დააკვალიანებს მათ, როგორ იმუშაონ. დააიმედა მომავალი თაობა, რომ რთული არაფერია, პირიქით, სასიამოვნო, საპასუხისმგებლო და საშვილიშვილო საქმეს ჩასჭიდებენ ხელს...
ბატონ ჯაბასთან დიალოგში ჩაერთნენ ისტორიის პედაგოგები: დალი ბუჩუკური და ბელა კოშაძე, საპროექტო ჯგუფის წევრები, მასწავლებელი ნათია მალიძე, ასმათ ჭარელიძე. დიდი გულისყურით უსმენდნენ სტუმარს მოსწავლეთა ოჯახის წევრებიც... მოეწონათ ბატონი ჯაბას მრავალმხრივი მოღვაწეობა, ეროვნული სულისკვეთება და ვუსურვებთ წარმატებებს ვიკი-სივრცეში ჩვენი ერის კულტურული მონაპოვრის შესანარჩუნებლად და გამოსამზეურებლად.
სტუმრად ეთნოგრაფიულ მუზეუმში
2021 წლის 20 მაისს საპროექტო ჯგუფის წევრები, მოსწავლეები და მშობლები ეთნოგრაფიულ მუზეუმს ვესტუმრეთ... წარსულთან შეხვედრა ძალიან ემოციური, საინტერესო და შთამბეჭდავი საფეხმავლო ტურით დაიწყო... ლამაზი ბუნება სიმწვანით, გაზაფხულის ფერადოვნებითა და მაცოცხლებელი ჰაერით შემოგვეგება. ვიმოგზაურეთ მე-19 საუკუნის საქართველოში, მოვისმინეთ გურული, მეგრელი, აფხაზური, რაჭული, იმერული ოდა-სახლებისა და საყოფაცხოვრებო ნივთების ისტორია,..
ჩემთვის განსაკუთრებით ამაღელვებელი აღმოჩნდა იმერული ეზო... ხის სახლი, ჭურ-მარანი, სასიმინდე... დავაბიჯებდი იმერულ ეზოში და ერთმანეთის მიყოლებით ცოცხლდებოდნენ ბავშვობის ფერადი დღეები.. მერე ეზოში დავსხედით და აკაკი წერეთლის ,,ჩემი თავგადასავალი" გავიხსენეთ, ქორობიას სახე ვუცვალეთ და ბავშვებთან ერთად კორონობია ვითამაშეთ... ოცნების რეალობად ქცევა ვცადეთ, კორონა-ქორს ვაჯობეთ და წიწილა ხელიდან გამოვტაცეთ.. იმედით, მადლიერებითა და ბედნიერებით სავსე გულით დავემშვიდობეთ ულამაზეს სავანეს და დავბრუნდით ჩვეულ გარემოში, სადაც არანაკლებ ამაღელვებელი, დროული და საჭირო ჩართვის მოლოდინი გვქონდა, teams-ის საგანმანათლებლო სივრცეში ქართული ვიკიპედიის რედაქტორი ჯაბა ლაბაძე გვსტუმრობდა...
Wednesday, May 19, 2021
კულტურული მემკვიდრეობის ღია მუზეუმის გახსნა!!!
Tuesday, May 18, 2021
18 მაისი - ეროვნული სამოსის დღე!!
სსიპ ქ. თბილისის №32 საჯარო სკოლა კვლავაც დიდი გამოწვევების წინაშე დგას. მიუხედავად პანდემიისა, პედაგოგები და მოსწავლეები აქტიურად მონაწილეობენ სასწავლო პროექტებში. ერთ-ერთი მათგანია კულტურული მემკვიდრეობის თემაზე. შექმნილი პროექტი „სათოფურიდან წინაპრები გვითვალთვალებენ“. პროექტის ხელმძღვანელი, სკოლის დირექტორი ქალბატონი ნინო კაშია პედაგოგებთან და მოსწავლეებთან ერთად ზრუნავს მომავალი თაობის ინტელექტუალურ და კულტურულ განვითარებაზე.
დღეს ეროვნული სამოსის დღეა. ამ დღესასწაულმა გააერთიანა მოსწავლე, მშობელი, მასწავლებელი, თემის წარმომადგენლები... რეგულაციების დაცვით, მაგრამ პატრიოტული სულის კვეთებით აღვსილი ახალგაზრდები აღნიშნავენ რანი ვიყავით, რანი ვართ და რანი ვიქნებით მომავალში. ჩოხა-ახალუხში გამოწყობილი ვაჟები დადიოდნენ და ულოცავდნენ თემს ჩვენი იდენტობის, კულტურის, ღირსებისა და მეობის აღმნიშვნელ დღეს. მათაც საოცრად უხდებოდათ ქართული სამოსი. სკოლის ეზოში გამოფენილი საქართველოს სხვადასხვა კუთხის ეროვნული სამოსი იწვევდა აღფრთოვანებას, ბედნიერებას, მადლიერებას დღევანდღელი დღის ორგანიზატორების მიმართ.
Sunday, May 16, 2021
სტუმრად კახეთში - დედას პური და ჩურჩხელა - არამატერიალური კულტურის ძეგლი
დიდი ინტერესით ჩავერთეთ პროექტში "ჩვენი კულტურული მემკვიდრეობა". საპროექტო ჯგუფის საინფორმაციო ხასიათის შეხვედრაზე გავიგეთ, რომ კახური პური (დედას პური) და ჩურჩხელა საქართველოს კულტურისა და ძეგლთა დაცვის მინისტრის ბრძანებისა და იუნესკოს კონცეფციის მიხედვით, 2015 წლის 7 ნოემბერს არამატერიალური კულტურის ძეგლად აღიარეს. გაგვიჩნდა სურვილი, ჩავსულიყავით ჩემს მშობლიურ კახეთში, გავსაუბრებოდით ადგილობრივ მაცხოვრებლებს, ჩვენი თვალით გვენახა და უშუალოდ მათგან მოგვესმინა დედას პურისა და ჩურჩხელის დამზადების ტექნოლოგია.
გათენდა 16 მაისის დილა, მე მშობლებისა და მეგობრის თანხლებით ვეწვიე კახეთს. მშობლიური ქიზიყი მაისისათვის დამახასიათებელი სიმწვანითა და ფერადოვნებით შემოგვეგება. დილით ადრე შემოვიარეთ თონეები, დავესწარით პურის ცხობის პროცესს, ვისაუბრეთ დედას პურის დამზადების ისტორიაზე, ტექნოლოგიასა და საზოგადოებრივ გამოცდილებაზე. ასევე დავესწარით კახური ჩურჩხელის ამოვლების პროცესსაც. ქალბატონმა მარიკა ბუთლიაშვილმა დიდი ყურადღებით მოგვისმინა, გულთან მიიტანა საპროექტო ჯგუფის სურვილი, მერე მარნიდან ბადაგი ამოიტანა, სპეციალურად ჩვენთვის თათარა მოადუღა და სახელდახელოდ ჩურჩხელებიც ამოავლო, პარალელურად დაწვრილებით გვიამბობდა "ქართული სნიკერსის" დამზადების წესზე და გვაცნობდა საკუთარ გამოცდილებას.
მე და ჩემმა მეგობარმა დღე შინაარსიანად და ლამაზად გავატარეთ, ჩვენი საქმიანი ვიზიტი გადავიღეთ და თბილისში დაბრუნებულებმა საპროექტო ჯგუფის წევრებს გავაცანით. მადლობა კახეთს - ღვინისა და ვაზის სამშობლოს, მადლობა ქალბატონ მარიკას გულთბილი მიღებისა და უშურველი მასპინძლობისათვის, მადლობა პროექტს "ჩვენი კულტურული მემკვიდრეობა".
- საპროექტო ჯგუფის წევრი ანანო მარგიშვილი
კულტურული მემკვიდრეობის კვირეული!
კვირეულის გეგმა:
17.05.21 - ეროვნული სამოსის დღესთან დაკავშირებით საინფორმაციო ხასიათის: ა) ვიდეორგოლების ჩვენება ბ) გაკვეთილების ჩატარება
18.05.21 - ფილმების ჩვენება - განხილვა კვირეულის განმავლობაში ეროვნული სამოსის დღის მილოცვა
18.05.21 - ეროვნული სამოსის გამოფენა
18.05.21 - ნორჩი მხატვრების თვალით დანახული ქართული ეროვნული შესამოსელი
19.05.21 - პოდიუმი - წითელ ხალიჩაზე ეროვნული სამოსის წარდგენა
19.05.21 - კულტურული მემკვიდრეობის ღია მუზეუმის მოწყობდა და გამოფენა
20.05.21 - ნორჩი მხატვრების თვალით დანახული კულტურული მემკვიდრეობა
20.05.21 - მუზეუმის საერთაშორისო დღის აღნიშვნა- სტუმრად ეთნოგრაფიულ მუზეუმში
20.05.21 - შეხვედრა-ვებინარი ქართული ვიკიპედიის რედაქტორ ჯაბა ლაბაძესთან
21.05.21 - ქართული კალიგრაფიის მასტერკლასი ლელა გაფრინდაშვილისაგან და შეხვედრა მხატვარ-კალიგრაფ ქალბატონ ლელა მესხთან
22.05.21 - საფეხმავლო ტური თბილისის ზღვაზე: ხალხური ტრადიციული დღესასწაულის - ბერიკაობის იმიტაცია ყეენის მთაზე
22.05.21 - ზურაბ წერეთლის მონუმენტის - ,,საქართველოს მატიანე” დათვალიერება
24.05.21 - შთაბეჭდილებების დღიური - კვირეულის ანალიზი
საპროექტო ჯგუფი
Saturday, May 15, 2021
სამუშაო შეხვედრა მაია ტყემალაძესთან
ქალბატონი მაია საქმიან შეხვედრაზე შეგვპირდა, რომ საპროექტო ჯგუფის წევრებს შეგვხვდება სექტემბერში და მისი დახმარებით წილად გვხვდება პატივი ჩვენი ხელწერაც ამშვენებდეს რუსთველის უკვდავ პოემას.
საპროექტო ჯგუფის სახელით აუწონელი მადლობა ქალბატონ მაიას ამ შემოთავაზებისათვის
მადლიერებით ნიკა შიტიკოვი
Friday, May 14, 2021
შეხვედრა კალიგრაფისტ ლელა გაფრინდაშვილთან
ჩვენი საპროექტო ჯგუფის შთამბეჭდავი და ემოციური შეხვედრა ჭიათურის მუნიციპალიტეტის ხალიფაურის საჯარო სკოლის ქართული ენისა და ლიტერატურის პედაგოგ, კალიგრაფ ლელა გაფრინდაშვილთან.
ამ შეხვედრაზე ზეიმობდა ერთი ღმერთი - ქართული სიტყვა ანბანის სამსახოვანი სილამაზითა და მშვენიერებით... და ამ საღამოს, როგორც ჩვენი ენამზე და ტკბილადმოუბარი სტუმარი თავის ულამაზეს ლექსში ამბობს: ,,33 ხმოსანი მოგვეჟღურტულა, შემოგვაფრქვია სურნელი ვარდით, ნარცისით, იით", ხოლო თავად ქალბატონი ლელა ვარდის სიახლოვით ამღერებული ბულბულის ენით უგალობდა ჩვენს ულამაზეს და უმდიდრეს ენას და გვაზიარებდა ქართული ასოების მოჩუქურთმების მეთოდებს... თანაც დაგვპირდა, რომ უახლოეს მომავალში ჩვენს მოსწავლეებს ჩაუტარებს მასტერკლასს და ქართულ ანბანს შესძენს უფრო მეტ მომფერებელ-მომჩუქურთმებელს...
ვებინარში აქტიურად ჩაერთნენ საპროექტო ჯგუფის წევრები, ქართული ენისა და ლიტერატურის, დაწყებითი კლასებისა და ესთეტიკის კათედრის პედაგოგები, მოსწავლეები, მშობლები... მათ სტუმარს დაუსვეს შეკითხვები და გამოხატეს მადლიერება პროექტის ორგანიზატორების მისამართით.
ვებინარის დასრულების შემდეგ, ქალბატონმა ლელამ შეაფასა საპროექტო ჯგუფის მუშაობა და ასე გამოხატა მადლიერება: ,,ძვირფასო ასმათ, თაყვანი და უღრმესი მადლობა ფრიად მნიშვნელოვანი, ამაღელვებელი და დაუვიწყარი ვებინარის ორგანიზებისა და განსაკუთრებული პატივისათვის.
უდიდესი სიყვარულითა და მადლიერებით გიძღვნით მადლობას უკლებლივ ყველას,საპროექტო ჟგუფს, კოლეგებს, მოსწავლეებს, მშობლებს, თითოეულ ადამიანს, ვისი წვლილიც იყო ამ ვებინარში.
დაე, მარად ვარსკვლავებანთებული, მბრწყინავი, ციმციმა თვალებით გევლოთ,იმ სიხარულისა და ბედნიერების მონიჭებისათვის, რომელიც ჩემთვის გაიღეთ!
თქვენთვის მლოცველი ლელა გაფრინდაშვილი"
Subscribe to:
Posts (Atom)